اسلام آباد۔30اکتوبر (اے پی پی):پالیسی ادارہ برائے پائیدار ترقی(ایس ڈی پی آئی) نے اقوام متحدہ کے ماحولیاتی پروگرام (یو این ای پی) کے تعاون اور یورپی یونین کی فنڈنگ سے”استعمال شدہ کپڑے کی تجارت کیلئے معیار اور ہدایات کی ترقی“ کے عنوان سے ایک ورکشاپ کا انعقاد کیا۔ اس ہائبرڈ ورکشاپ کا مقصد پاکستان کے بڑھتے ہوئے دوسرے ہاتھ کے کپڑے کے شعبے کے گرد ایک مضبوط فریم ورک بنانا اور پائیدار طریقوں اور پالیسیوں کو فروغ دینا تھا۔ایس ڈی پی آئی کے سربراہ ڈاکٹر عابد قیوم سلہری نے اس پیشرفت کی تعریف کرتے ہوئے امید ظاہر کی کہ استعمال شدہ کپڑوں پر ریگولیٹری ڈیوٹیوں کا خاتمہ کرکے اس شعبے کو پاکستان کی سرکلر معیشت کے مستقبل کی بنیاد بنایا جائیگا۔
یو این ای پی کے اسد نقوی نے اس صنعت کے بارے میں غلط فہمیاں دور کرنے کی اہمیت پر زور دیا۔ ایس ڈی پی آئی کی ایسوسی ایٹ ریسرچ فیلو زینب نعیم نےاس شعبے کا جائزہ لینے اور پائیدار تجارتی طریقوں کو بہتر بنانے پر زور دیا۔یو این ای پی کی بیٹریز فرنانڈز نے خو اتین کیلئے کپڑوں کی اقتصادی اہمیت کو اجاگر کیاجو اس شعبے کی 45 فیصد افرادی قوت تشکیل دیتی ہیں۔ انہوں نے مائیکروپلاسٹک آلودگی جیسے ماحولیاتی مسائل کو حل کرنے پر بھی زور دیا، جس میں ٹیکسٹائل کی صنعت کا 9 فیصد حصہ ہے۔
ری ٹیکس گلوبل کے سی ای او مصطفی ستار نے استعمال شدہ کپڑوں کے شعبے کی اہمیت پر گفتگو کرتے ہوئے بتایا کہ 90 فیصد کپڑے بغیر پانی یا گیس کے ری سائیکل کئے جاتے ہیں۔وزارت تجارت کے عمر فاروق نے مضبوط قوانین کے قیام کیلئے جاری کوششوں کی اہمیت پر زور دیا۔ انہوں نے کہا کہ یہ ورکشاپ پاکستان میں ایک زیادہ پائیدار اور دائری ٹیکسٹائل شعبے کی تشکیل کی طرف ایک اہم قدم ہے جو یو این ای پی کے ہدف ماحولیاتی اثرات کو کم سے کم اور اقتصادی مواقع کو زیادہ سے زیادہ کرنے کے ساتھ ہم آہنگ ہے ۔
© 2025 SDPI. All Rights Reserved Design & Developed by NKMIS WEB Unit
