اسلام آباد (لیڈی رپورٹر)وزیراعظم کے ترجمان ندیم افضل چن نے کہا کہ ملک میں جمہوریت کے نظام کو مضبوط بنانے کے لئے سیاستدانوں کو عوام کے لئے رول ماڈل بننا ہوگا۔ آج کی جمہوریت ماضی کے مقابلے میں زیادہ بہتر ہے ۔ گزشتہ روز پالیسی ادارہ برائے پائیدار ترقی (ایس ڈی پی آئی) کے ز یرِ اہتمام’ ’جمہوری حکومتوں کا تسلسل، مواقع اور چیلنجز ‘ ‘کے عنوان سے منعقدہ سیمینار سے خطاب میں ندیم افضل نے کہا کہ جمہوریت کے نظام میں خرابی کی وجہ تمام سیاسی قوتیں ہیں جس سے اشرافیہ طبقہ بھرپور فائدہ اُٹھا رہا ہے اور بدقسمتی سے یہ اشرافیہ ہر سیاسی جماعت میں موجود ہے ۔ انہوں نے میڈیا کی آزادی پر کسی بھی قسم کی پابندی سے انکار کرتے ہوئے کہا کہ میڈیا آج آزاد ہے اور کہا کہ یہی میڈیا ہمیشہ معاشرے کے اشرافیہ کے دباؤ میں رہا ہے ۔ پیپلزپارٹی کے رہنما چودھری منظور احمد نے کہا کہ یہ ہر سیاسی جماعت اور ادارے کی ذمہ داری ہے کہ جمہوری نظام کو مضبوط کیا جائے اور بغیر کسی رکاوٹ کے چلنے دیا جائے ۔انہوں نے کہا کہ ٹریڈ یونین ، طلبا یونین کے خاتمے اور سیاسی جماعتوں کوتوڑنے کی روش سے ہمارا جمہوری نظام کمزور ہوا۔ اب وقت آگیا ہے کہ ہمیں ان اداروں کے کردار اور آئینی حد ود پر کھل کر بحث کرنی چاہیے ۔ ایس ڈی پی آئی کے ایگزیکٹو ڈائریکٹر ڈاکٹر عابد قیوم سلہری نے موجودہ حکومت کی پہلے ایک سال کی کارکردگی کا تجزیہ کرتے ہوئے کہا کہ معاشی اور خارجہ پالیسی کے حوالے سے حکومت کی کارکردگی بہتر رہی،ن لیگ کی ایم این اے رومینہ خورشید عالم نے کہا کہ حکومت تما م محاذ پر ناکام رہی اور اداروں کو متنازع بنایا۔ 

 

 

Source: https://www.roznama92news.com/%D9%82%D9%88%D8%AA%DB%8C%DA%BA-%DA%BA%D9%86%D8%AF%DB%8C%D9%85-%D8%A7%D9%81%D8%B6%D9%84