اسلام آباد (سٹاف رپورٹر)وفاقی وزیر منصوبہ بندی، ترقی، اصلاحات و خصوصی اقدامات اسد عمر نے کہا ہے کہ ڈیجیٹل اکانومی پاکستان کیلئے انتہائی ضروری ہے، اسے نہ صرف ایلیٹ کلاس بلکہ نچلے طبقے تک بھی قابل رسائی بنانا چاہئے، جدید ٹیکنالوجی کا دور ہے، ہم سب کو معلومات ہوتی ہیں کہ حکومت کیا کر رہی ہیں، کوئی بے خبر نہیں، ہمیں وزارت انفارمیشن ٹیکنالوجی کو مزید خودمختار بنانا ہے۔ ان خیالات کا اظہار انہوں نے منگل کو ایس ڈی پی آئی ڈیجیٹل کانفرنس سے خطاب کرتے ہوئے کیا۔ اسد عمر نے کہا کہ سوشل سیکٹر ریسرچ میں ایس ڈی پی آئی کا بڑا اہم کردار ہے، ہمیں انٹر پرینیور شپ کو آگے بڑھانا ہے اور ضروری نہیں کہ بہت بڑے پیمانے پر بلکہ چھوٹے پیمانے پر بھی سرمایہ کاری کر کے ہم ملکی ترقی میں ہاتھ بٹاسکتے ہیں۔ انہوں نے کہا کہ جب ہم گورننس کی اکائونٹ ایبلٹی کی بات کرتے ہیں تو اس کے اندر ڈیجیٹل ٹیکنالوجی کا بہت اہم کردار ہوسکتا ہے، آج کے دور میں معلومات تک ہر ایک کو رسائی حاصل ہے، ہر ایک کو معلوم ہوتا ہے کہ حکومت کیا کررہی ہے، کوئی بے خبر نہیں ہے۔ انہوں نے کہا کہ ہمیں وزارت انفارمیشن ٹیکنالوجی کو مزید خودمختار بنانا ہے۔ انہوں نے کہا کہ ڈیجیٹل اکانومی ملک کے لئے انتہائی اہم ہے، اس کو نہ صرف ان لوگوں تک پہنچانا چاہئے جن کا تعلق ایلیٹ کلاس سے ہو بلکہ اسے نچلے طبقے تک بھی رسائی دینی چاہئے۔ انہوں نے کہا کہ حکومت کو تعلیمی اداروں اور نجی سرمایہ کاروں کو ساتھ لے کر چلنا ہے تاکہ ہم جدید ٹیکنالوجی سے ہمکنار ہو سکیں۔ انہوں نے کہا کہ ہمیں وزارت انفارمیشن ٹیکنالوجی کو مزید خودمختار بنانا ہے۔ انہوں نے کہا کہ ڈیجیٹلائزیشن کے ذریعے معاشی سرگرمیوں کو مانیٹر کیا جا سکتا ہے.

 

Source: https://www.dailyausaf.com/epaper/popup.php?newssrc=issues/2019-12-04/97734/631120