کانفرنس کا انعقاد مقامی ہوٹل میں یو این ای ایس سی اے پی کے چھٹے جنوبی اور جنوب مغربی ایشیا کے اعلیٰ سطحی سیاسی فورم کے تحت کیا گیا ۔کانفرنس 8 دسمبر تک جاری رہے گی۔ ڈاکٹر معید یوسف نے کہا کہ پاکستان کو پرائی مشکلات سر لینے کی بجائے اپنی ترجیحات متعین کرنا ہوں گی، پاکستان اپنے ہنر مند افراد کو عمر رسیدہ آبادی والے ممالک میں بھجوا کر زرِ مبادلہ کما سکتاہے،اس کے لئے پاکستان کو جرأت مندانہ پالیسی اپناناہو گی۔

انہوں نے مزید کہا کہ قوانین و آئین کی مدد سے حکومتی پالیسیوں میں تسلسل ضروری ہے۔ اس موقع پر پاکستان سر مایہ کاری بورڈ کے سابق چیئر مین ہارون شریف نے پاکستان کی مشکلات پر روشنی ڈالتے ہوئے کہا کہ عالمگیریت علاقائی سطح پر آرہی ہے ۔ ہمیں علاقائی تجارت کو فروغ دینے کے لئے پیداواری لاگت میں کمی لانا چاہئے۔ پائیدار ترقی سالانہ کانفرنس کے موقع پر جنرل ریٹائرڈ زبیر محمود حیات نے کہا کہ عالمی سطح پر طاقت کے محور تبدیل ہو رہے ہیں بھارت میں انتہا پسند ی سیاسی دھارے میں شامل ہو چکی ہے، ہمارا ہمسایہ ملک اب اکھنڈ بھارت کا روپ دھارنا چاہتا ہے۔

انہوں نے مزید کہا کہ بھارت کی انتہا پسندانہ معاشی مفادات کی سیاست کا مقا بلہ کرنے کے لئے پاکستان کو توانا پالیسی سازی کی ضرورت ہے ۔انہوں نے کہا کہ ٹیکنالوجی کا مقابلہ جدت سے ہی ممکن ہے۔ انہوں نے کہا کہ گرین توانائی کا فروغ ناگزیر ہو چکا ہے ہمیں انسانی و سائل کو بہتر اور مفید بناناہو گا۔ اس موقع پر ایس ڈی پی آئی کے سر براہ ڈاکٹر عبدالقیوم سلہری نے کہا کہ کورونا وباءکے دوران عالمی سطح پر تمام شعبہ جات میں خاطر خواہ تبدیلیاں آئی ہیں ہر منڈی کسادبازاری کا شکار ہے۔ عالمی ادارہ برائے خوراک کے مطابق دنیا غذائی قلت کا شکار ہو سکتی ہے۔ انہوں نے کہا کہ موسمیاتی تبدیلیوں کے انتہائی نقصانات سامنے آرہے ہیں۔